Comun de Ciampedel aut 1.448 m. spersa kmq 25,09

L paìsc

Sie inom ladin l'é n diminutif che vegn dal latin "campus" = ciamp; l paìsc l'é a 1.448 m / s.l.m. e l'à 747 sentadins. Sora l paìsc l'é Col Rodela, che vegn ence nominà "barcon de la Dolomites" per la veduda maraveousa che se pel goder, e se l pel arjonjer da Ciampedel sù co na forenadoa zis moderna. Envers nord se pel veder duta la cedena de Saslonch, envers nord-est se pel mirèr l Sas Pordoi, l Sela e la Marmolèda. La Val Duron l'é n bel lech olà fèr na raida, ajache la é piena de fiores da mont; l'é la Val che stèsc te anter l Grop del Ciadenac e chel del Saslonch. Jà ti tempes veiores la vegnìa durèda da la comunanza de Ciampedel per jir a mont co la besties e per se enjignèr l fen. La Val Duron la va envers la mont de Sousc: chesta strèda vegnìa durèda jà te la preistoria desche coleament per l comerz co la popolazions de Sousc, Ciastelrot e Dier.

La gejia, dedichèda ai Sènc Felip e Giacum, l'é una de la più veies de la Val e la vegn nominèda per la pruma outa te n document del 1245. La é stata fata sù tel stil gotich del 1525. L parei che vèrda a sud, apede etres depenc a fresch, l'é ence fornì da n Sèn Crestofol zis gran fat sù del 1689.

Pian l'é na carateristica frazion da mont, ades stravardèda per chel che revèrda l'ambient e l'urbanistica, e l'é n veie paìsc olache l'agricoltura e l lurier da pèster dajea da viver a sia jent. L'é logà su per la rives sora l paìsc de Ciampedel a 1.540 metres. Ciampedel l'é stat l prum zenter turistich-alpinistich de la Val de Fascia, coi hotìe "Mulino" e "Agnello d'oro". Ben cognosciù tel mond scientifich internazionèl (vedù sia emportanza geologica), l'é stat te la seconda metà de l'800 l lech da olache i pontèa demez per duta la esplorazions ti gropes dolomitics dintornvìa.

Foto fassanews.com