Comun de Mazin aut 1.372 m. spersa kmq 23,69

L paìsc

L'é l comun più pìcol de la Val, con si 455 sentadins sparpagné anter Mazin, Ciampestrin e Fontanac, paìjes che se scontra un dò l'auter te chela che se va envers Cianacei, a 1.372 m/slm. Dal paìsc la veduda la va da nord est olache se veit Sas Pordoi e l Grop de Sela enscin a Sas da les Doudesc a sud. L'inom del paìsc l'à na naa pech segura e mìngol senestra; aboncont somea che l vegne cà da "Mazung" na parola todescia che vel dir atività del molin, n lech olache l'é logà desvalives molins a èga; amò ades se pel veder enlongia jù l Ruf de Udai i resc' de la sies e di molins che vegnìa fac jir dal ruf amò al scomenz del centené passà. La gejia de Sènta Maria Madalena, declarèda del 1802 espositura de la Pieif de Fascia, la é del 1500.

Da Mazin se pel pontèr demez per fèr raides zis beles: la Val de Antermoa che porta al grop del Ciadenac de Antermoa, l'é na val duta ciavèda fora te la dolomia ladinica. Jun fon l'é n pìcol lèch (l lèch de Antermoa, m. 2.497) leà a veia contìes ladines. La Val de Udai, fona e serèda ite tel toch più aut, la segna l confin anter i sasc vulcanics e la dolomia.

La frazions de Mazin l'é Ciampestrin (da l'agetif latin "campester" = de ciamp) e Fontanac (da "fontana" = fontèna) che vel dir che l'é n teren da èghes; l'é un di topònims più veies de la Val de Fascia, jà troà te n document del 1142 olache l'era scrit desche "Vundenates".

Foto fassanews.com