Comun de Poza aut. 1.325 m. spersa: kmq 73,12

L paìsc

Dal latin"puteus" = poz, l'à presciapech 1.821 jent, l'é logà te mez a la Val tel post olache la é più lèrgia e l'é a 1.325 m./s.l.m.. Chiò fioresc l'artejanat de la mobilia, del legn, e semper chiò à sia senta l Comprenjorie Ladin e la Scola d'Èrt "Giuseppe Soraperra". Se se vèrda envers sud est se pel veder i pré e l bosch de la Val de S. Nicolò, olache se pel jir co l'auto enscin ta Saùch e ta Tieje, e se pel troèr amò desvaliva tiejes e baic olache, zacan, vegnìa metù l fegn e olache stajea la jent che jia sa mont a seèr e a pèst co la vaces. Envers nord se pel mirèr dut l grop del Saslench enveze envers ovest (mascima da Meida ca) se pel se goder i spic del Larsech.

L frabicat de la Torn, che ades l'é na cèsa privata, l'é dassen enteressant da veder: con sia strutura a cadrat e de pìcoi bochiéres l'é l soul ejempie de veia fortificazion che é amò te Val (XVI sec.). N frabicat che ge someèa l'era la "Cort de Fascia" sa Vich che però la é stata batuda jù del 1935.

A sud est de Poza l'é na fontèna de èghes da solper che jà del 1500 vegnìa durèda per curèr la malatìes de la pel.
Na frazion emportanta de Poza l'é seguramenter Pera (dal latin "petra" = sas) toponim che fazilmenter vegn cà da chel gran peron che é vegnù jù vindò l'alberch Rizzi. Na outa l'era comun a sè; l'é dalonc 1 km da Poza, semper su la Strèda 48 de la Dolomites.
La gejia de Sèn Lorenz, del 1600, à daìte n utèr dassen prezious che à la medema carateristiches del "Flügelaltar" (preziousc ùteres da porteles metui ensema da rilieves ordené delvers) e l'é na opera de n artist da chiò, l maester Gere de la Poza da Ciampedel.

N'autra frazion l'é Meida, da olache se pel montèr te na forenadoa per ruèr sun Bufaure e se godèr la veduda sul Ciadenac, i parees a sud est del Saslonch e l Latemar. L'é dapò la frazions de Ronch e Muncion, da vijitèr vedù che se pel amò veder desvaliva cesès da zacan e tobié carateristics.

Foto fassanews.com